Česćene wučerki a česćeni wučerjo, waženi refererenća a hosćo!

Tež ja chcu Was jara wutrobnje tu w Chrósćicach na mjeztym 4. fachowy dźeń 2plus witać, kotrež zarjaduja kultusowe ministerstwo, Krajny zarjad za šulu a kubłanje, stejišćo Budyšin a Rěčny centrum WITAJ w Budyšinje.

Směm Wam na tutym městnje wutrobne postrowy našeho přirjadnika knjeza Wićaza sposrědkować. Wón prosy wo zrozumjenje, zo njemóže so tu dźensa wobdźělić. Zašłe tydźenje běchu za njeho z jara wjele dźěłom zwjazane. Wón skutkowaše w koaliciskich jednjanjach sobu. Wjeselu so, zo mam składnosć, za njeho dźensa k Wam tule rěčeć směć.

Spytam so tuž k fachowje jara naročnym temam žiweje dwurěčnosće, k za to trěbnemu wědomostnemu přewodej kaž tež k wšědnym nadawkam nawody šulskeho zarjada wuprajić.

To njeje z mojeho wida scyła tak ćežko. Wy diskutujeće wo resursach čłowjekow, wo motiwaciji a interakciji. Smy nošer cyłkownje třiceći šulow, ke kotremuž tež Serbski šulski a zetkawanski centrum słuša. Z tym staramy so wo techniski a organizatoriski wobłuk, zo móžeće Wy Waše nadawki derje spjelnjeć. W našich šulach so na cyle rozdźělne wašnje serbšćina posrědkuje. We wšěch padach wobhladujemy pak so jako posłužbnik.

W tutej róli dožiwjamy napjaty čas.

Na jednym boku mamy planowanje šulskeje syće a na tamnym boku digitalizaciju šulow na swojim blidźe. Wobaj procesaj matej wliw na zwoprawdźenje Wašeho dźěła. Planowanje šulskeje syće jako instrument, z kotrymž hodźeli so poskitki na šulach wodźić, ma klětu w hodowniku dozhotowjeny być.

Za to je trjeba na slědowace prašenja wotmołwić kaž:

-      Móža wšě šulske stejišća wot stupacych ličbow šulerjow profitować?

-      Kak wuskutkuja so wosebite wuknjenske poskitki a wuknjenske koncepty na šulerske prudy?

-      Kotre městno zabjerje inkluzija?

-      Kak hodźa so serbskorěčne poskitki hišće sylnišo do šěršeje zjawnosće přinjesć? Mamy za to w dosahacej měrje trěbny kwalifikowany wučerski personal?

-      Trjebamy přistupne kriterije za wodźenje? Jelizo haj, za kotre šulske družiny?

Na wšě tute prašenja nadźijamy so wotmołwow. K tomu słuža wuradźowanja ze šulemi a šulskimi nošerjemi, ale tež fachowa wuměna dźensa.

Digitalizacija je zaběžała. Zakładne wuměnjenje je přecyłne šěrokopasmowe zastaranje. Ze zwoprawdźenjom tutoho sobu najwjetšeho projekta w Zwjazkowej republice je naš wokrjes hižo jara daloko. Ke kóncej lěta 2020 maja dźěła zakónčene być.

Sumu 6,4 mio. €, kotruž za digitalizaciju šulow w nošerstwje wokrjesa dóstanjemy, wužiwamy k 80% za infrastrukturu a k 20% za syćowu techniku, displayje und kónčne nastroje. Tute rozrjadowanje, kotrež měło so dodźeržeć, kwalifikuje „digitalny pakt“ jako infrastrukturny program!

Na kotrym městnje su prašane šule a sće to z tym tež wy? Kóžda šula měła sej dokładnje přemyslować, kak chcyła wona z móžnosćemi přiběraceje digitalneje wučby wobchadźeć. Za mnje digitalizacija njewoznamjenja, zo wšitcy hnydom z tabletom dźěłaja.

Próstwa, kotruž dyrbja nošerjo šulow w juniju 2020 zapodać, ma mjez druhim koncepty za medijowe kubłanje na šuli wobsahować. W tutych ma kóžda šula wotpowědnje formulować, što měło so hdźe a kak z digitalnymi poskitkami a móžnosćemi stać.

Tohodla apeluju na wšě šule a na wšěch šulskich nošerjow, tutón termin chutnje brać! Za to trěbny přihotowanski čas je hladajo na tajku kompleksitu jara krótki. Na ewentualne podlěšenje resp. znowa poskićenje programa njemóžemy so nadźijeć.

Wosobinsce widźu tu z wotpowědnje wotwaženym zasadźenjom wulku šansu, rěč na moderne wašnje a z wulkej metodiskej mnohotu sposrědkować.

Je to tola wulka motiwacija, rěč w tajkej spomóžnej wokolinje wuknyć!

Rěčny centrum WITAJ zabjerje w tutym procesu po mojim měnjenju sobu rozsudnu poziciju. Při pytanju za idejemi přeju Wam wjele wjesela a wjele kreatiwnych mysličkow!

Wutrobny dźak!